Komuna e Malishevës, përkatësisht drejtoria komunale për arsim dhe shkollat e Komunës së Malishevës, përmes aktiviteteve të ndryshme kanë shënuar Ditën e Mësuesit. Ndërsa në Shtëpinë e Kulturës “Tahir Sinani”, organizuar nga DKA është mbajtur takimi qendror, ku janë nderuar mësuesit për punën e tyre, si dhe janë nderuar edhe veteranët e arsimit të trevës sonë.
“Jemi në kuadër të shënimit të datave më të shenjta të popullit shqiptar, të 5,6 dhe 7 marsit të Epopesë së lavdishme të UÇK-së dhe të 7 Marsit, Ditës së Mësuesit, dy nga datat me më rëndësi në historinë e popullit shqiptar”, tha kryetar Begaj, duke marrë fjalën, me rastin e shënimit për nderë të 7 Marsit, Ditës së Mësuesit.
Më pas, kryetar Begaj, e vlerësoi lartë punën dhe angazhimin e mësuesve shqiptar ndër vite dhe përpjekjet e tyre, në arsimimin e popullit shqiptar. Po ashtu Begaj, foli edhe për kontributin e jashtëzakonshëm të mësuesve tanë në luftën e UÇK-së, kujtoi sakrificat e mësuesve dhe punëtorëve të arsimit, sakrificë, e cila siç tha kryetari Begaj, “na obligon neve të punojmë edhe më shumë, e sidomos në krijimin e kushteve më të mira për mësimdhënësit”.
Ndërsa drejtori i Drejtorisë për Arsim dhe Edukim, Blerim Thaçi, pasi i përshëndeti të gjithë mësimdhënësit e Komunës së Malishevës, tha se “në këtë kremtim të përbashkët, ne të gjithë mund të pasqyrojmë energjitë tona, për të rikujtuar shtegtimin tonë historik e kombëtar, për dinjitet e prosperitet kombëtar”.
“Sot ne përkujtojmë figurat më të ndritura të kombit tonë, kujtojmë Marsin, muajin e bekuar që na solli edhe shkollën e parë shqipe”, tha Thaçi.
Më pas, DKA e Malishevës, ka ndarë mirënjohje për shkollat e dalluara në mësim, kulturë artistike dhe në mirëmbajtje të ambientit, pastaj për mësuesit më të dalluar, për kontributin e tyre. Punëtorët e arsimit, pas vdekjes. Pastaj janë ndarë mirënjohje edhe për nxënësit e dalluar, recitues dhe matematikan, të cilët kanë dalë fitues në garat e mbajtura, në kuadër të shënimit të 7 Marsit, Ditës së Mësuesit./PrizrenPress.com/