Në disa shkolla të komunave të ndryshme të Kosovës, ende nuk ka filluar procesi mësimor. Ndërsa përfaqësuesit e Ministrisë së Arsimit, thonë se nuk janë të informuar për këtë. Drejtorët e shkollave, thonë se MASHT-in e kanë njoftuar në kohë për rinovimet që janë duke u bërë në këto shkolla nga Komisioni Evropian. Ndërkaq, sipas tyre, mësimi do të zëvendësohet të shtunave, dhe gjatë pushimeve dimërore dhe pranverore,shkruan Tribuna
Jashar Lushtaku, drejtor i Drejtorisë për Arsim në Komunën e Skenderaj, thekson se procesi mësimor nuk ka filluar ende në Shkollën Fillore “Ismet Rrahmani”, në Açarevë dhe në Shkollën Fillore “Migjeni”, në fshatin Kllodernicë. “Shkolla në Açarevë është në përfundim e sipër. Mendojmë që javën e ardhshme të fillojë mësimi, ndërsa në shkollën ‘Migjeni’ janë kërkuar punë shtesë nga drejtoria e shkollës, dhe mund të shtyhet fillimi i mësimit edhe për disa ditë”, ka theksuar ai.