“Shtëpia është djegur nga faktori njeri. Aty kanë hyrë shumë njerëz të rrugës, të cilët edhe janë droguar dh nga pakujdesia e tyre ajo është djegur”, ka pohuar për “Kosova Sot” drejtori i Drejtorisë së Emergjencës në komunën e Prizrenit, Bedrija Ejupagiq
Të martën, një ndërtesë që është aset i përfshirë në Listën e Trashëgimisë Kulturore nën Mbrojtje të Përkohshme të MKRS-së, si pjesë e kompleksit të Kishës Katolike, zonja ndihmëtare, është përfshirë nga zjarri në rrethana ende të pasqaruara nga organet e emergjencave dhe të sigurisë. Objekti kohë më parë nga pushteti lokal i Prizrenit i është dhënë në shfrytëzim Kishës Katolike të Kosovës.
Rasti i shpërthimit të zjarrit në këtë objekt kërkon hetim të menjëhershëm dhe të hollësishëm nga organet e hetuesisë. Shoqëria civile reagon lidhur me dëmtimet e objekteve të mbrojtura të trashëgimisë kulturore brenda Qendrës Historike të Prizrenit. Lidhur me këtë, Hajrullah Çeku, nga OJQ-ja “Ec Ma Ndryshe”, ka thënë se objektet e mbrojtura të trashëgimisë kulturore brenda Qendrës Historike të Prizrenit vazhdojnë që të shkatërrohen, ndërkohë që institucionet përgjegjëse ende nuk kanë gjetur forma të përshtatshme për ruajtjen e tyre.
Kërkohet nga hetuesia të zbardhet rasti
“EC Ma Ndryshe” ka vlerësuar se institucionet përgjegjëse për ruajtjen e vlerave të Qendrës Historike të Prizrenit ende nuk e kanë krijuar një sistem të duhur të koordinimit ndërmjet tyre dhe se mungesa e bashkëpunimit po ndikon në degradim. “EC Ma Ndryshe” u bën thirrje autoriteteve lokale dhe qendrore që të ndërmarrin veprimet e duhura konform përgjegjësive ligjore që kanë për të parandaluar përsëritjen e skenarëve të tillë në pjesë të tjera të Qendrës Historike të Prizrenit, derisa kërkon edhe nga organet e hetuesisë që ta zbardhin rastin në tërësi”, pohon Çeku./kosova sot/