Seanca gjyqësore e paraparë të mbahej të enjten, në Gjykatën Themelore në Prizren, kundër Nuridin Begollit, i akuzuar për keqpërdorim të informatës zyrtare, ka dështuar për shkak se ka munguar mbrojtësi i tij, avokati Hajrip Krasniqi.
Në seancë ka marr pjesë avokati Klodian Krasniqi, i cili ka paraqitur një autorizim zëvendësues për të përfaqësuar të akuzuarin, mirëpo i pandehuri nuk ka pranuar që të përfaqësohet nga dikush tjetër, përveç avokatit Hajrip Krasniqi.
Begolli ka kërkuar që të shtyhet seanca në mënyrë që të mbrohet me avokatin e tij, i cili e ka mbrojtur deri më tani, sepse ai është në dijeni më të mirë të çështjes së tij, derisa ka thënë se avokati i tij, është i angazhuar në një çështje tjetër në Prishtinë.
Në anën tjetër, përfaqësuesja e palës së dëmtuar, avokatja Emira Gavazaj-Gashi, ka kundërshtuar shtyrjen e kësaj seance, duke thënë se nuk është profesionale kjo mënyrë e veprimit nga pala e akuzuar dhe se sipas saj, kjo po bëhet vetëm për të prolonguar çështjen penale.
Prokurori i rastit, Genc Nixha, ka deklaruar se duke pasur parasysh që procedura ka arritur në fazën kur i akuzuari merret në pyetje, atëherë është e domosdoshme që në seancë të prezantojë mbrojtësi i tij, që e ka mbrojtur atë, për më shumë se 10 seanca. Andaj, nuk e ka kundërshtuar kërkesën e të akuzuarit për shtyrjen e kësaj seance.
Kryetarja e trupit gjykues, Raime Elezi, ka pranuar kërkesën e të akuzuari dhe seancën e ka shtyrë për 30 tetor 2017, në ora 13:00.
Ndryshe, rreshteri i Policisë së Kosovës, Nuridin Begolli, akuzohet nga Prokuroria Themelore në Prizren, se në cilësinë e zyrtarit policor, ka zbuluar informatën zyrtare për personin tjetër, duke i dhënë atij një përparësi që nuk i takon.
Sipas aktakuzës, Begolli ka njoftuar qytetaren Altina Kolukaj, për numrin e veprave penale dhe të kundërvajtjes, të kryera nga qytetari Deli Hoxha, e i cili informacion, ka ndikuar në prishjen e raporteve në mes këtyre dy personave./betimiperdrejtesi/