Zëvendëskryeministri dhe ministri i Punëve të jashtme i Kosovës Hashim Thaçi, ka njoftuar se në Vjenë sot pasdite ka mbajtur një, siç e ka quajtur ai, prezantim të diplomacisë ekonomike kosovare. Aty ai ka prezantuar mundësitë investive në Kosovë.
Lexojeni të plotë postimin e Thaçit në FB
Pas takimeve të dendura në Prishtinë, pasdite mbajta një prezantim të diplomacisë ekonomike kosovare në një panel në Vjenë. Aty prezantova mundësitë investive në Kosovë me drejtorin e Institutit për promovim ekonomik pranë Odës Ekonomike Austriake Karl H. Pisec, Oskar Mencer drejtor i Computer Architecture Research Group në Imperial College të Londrës, Mario Rehulka Presidenti Asociacionit të Aviacionit Austriak, Traicho Traikov, ish Minister i ekonomisë në Bullgari dhe Jan Zielonka, profesor në Universitetin e Oksfordit.
Gjatë prezantimit tim theksova rëndësinë e madhe që ka investimi në infrastrukturë kombëtare për të siguruar rritjen ekonomike. U tregova të pranishëmve që Kosova ka ndërmarrë investime shumë të rëndësishme dhe cilësore në këtë fushë duke ndërtuar autostradën Prishtinë-Shqipëri, aeroportin modern të Prishtinës si dhe duke nisur autostradën që shkon drejt Shkupit. Para përfundimit janë edhe investimet në Brezovicë, TC Kosova e Re por edhe investimet austriake ne hidro-energji.
Mirëpo tanimë ka ardhur koha që të merremi me projekte infrastrukturore më të mëdha rajonale që do të kërkojnë mbështetjen nga investitorë dhe donatorë të huaj.