Gjykata e Apelit ka vendosur të lërë në burg Klevis Bejtajn, përgjegjës për vjedhjen e 713 milionë lekëve në Bankën e Shtetit. Ajo ka lënë në fuqi vendimin për ‘arrest me burg’ të Gjykatës së Shkallës së Parë.
Klevis Bejtaj, 27 vjeç, nipi i Ardian Bitrajt, doli sot para Gjykatës së Apelit, ku mori masën për qëndrimin në burg. Ai është arrestuar me akuzën e “moskallëzimit të krimit”, sepse ka pasur dijeni për vjedhjen që Bitraj kishte bërë në Thesarin e Shtetit.
Përfshirja e 27-vjeçarit në këtë supervjedhje është faktuar nga disa elementë të hasur nga prokuroria gjatë hetimeve.
Sipas tyre, Klevis Bejtaj, ishte në dijeni të vjedhjes, pasi është fiksuar nga kamerat duke pritur në makinë jashtë ambienteve të thesarit, dajën e tij, Ardian Bitraj, teksa ky i fundit dilte me shumën e parave të vjedhura.