Ligji për Veteranët e Luftës është votuar sot edhe nga deputeti Ukë Rugova, i cili, siç dihet ndodhet në paraburgim në Lipjan.
Në fakt, vota e tij është falsifikuar, gjegjësisht, në vend të tij ka votuar ndonjëri prej kolegëve në Kuvendin e Kosovës.Me ta vërejtur këtë çështje, ka reaguar kryetari i Kuvendit të Kosovës, Jakup Krasniqi, i cili ka konstatuar se deputeti Rugova ka votuar për ligjin në fjalë.
Vota e tij nuk ishte as për as kundër, por abstenim, por si e tillë është numëruar si pjesëmarrje në votim.
“Prekni butonat ta këqyrim. Elektronika s’ka gabon. Unë e dhashë sqarimin për media dhe nuk dua ta zgjasë më shumë”, ka thënë Krasniqi, duke shtuar se deri të hënën do të sqarohet në tërësi votimi i Ukë Rugovës.
Personi i parë që e ka vërejtur këtë gjë është deputeti i Lidhjes Demokratike të Kosovës, Arben Gashi, i cili, pak kohë pas votimit nëpërmjet një postimi në faqen e tij në Facebook, ka njoftuar “opinionin e gjerë” se vota e të birit të ish-presidentit Ibrahim Rugova është keqpërdorë.
Ukë Rugova dyshohet se është përfshirë në keqpërdorime dhe korrupsion për lëshimin e vizave në Ambasadën e Italisë në Prishtinë. Kohë më parë ai është arrestuar nga Policia e EULEX-it dhe më pas është paraburgosur.