Ish-komandanti i UÇK-së, Esat Krasniqi u varros sot në varrezat e Prizrenit.
Ceremonia e varrimit është organizuar nga Organizata e Veteranëve të Luftës së UÇK-së.
Në emër të Këshillit organizativ ka folur Hajrim Çengaj.
“Esat Krasniqi, një jetë të tërë ia kushtoi aspiratave të shqiptarëve të Kosovës duke dhënë kontribut të jashtëzakonshëm për lirinë e saj”, tha ai.
Sekretari i degës së OVL-së së UÇK-së në Prizren, Isa Berisha, tha ndërkaq se është vështirë të ndahesh nga komandant, Esat Krasniqi.
“Ai pas vetes ka lënë vepra madhore në shërbim të atdheut”.
Ish- komandant i brigadës 138 ” Agim Ramadani”, Rrustem Berisha tha se Esati radhitet në mesin e kolosëve të kombit tonë.
I pranishëm në këtë ceremoni varrimi ishte edhe kryetari i Prizrenit, Mytaher Haskuka, i cili tha se “sot po ndahemi nga një personalitet i shquar kombëtar i cili nuk ndaloi angazhimin e tij qytetar në shërbim të popullit në Kosovën e lirë”.
Në emër të familjes, pjesëmarrësit i ka falënderuar i biri i komandant, Esat Krasniqi, Endriti.
Ndryshe, Esat Krasniqi, ka ndërruar jetë mbrëmë në Spitalin e Prishtinës./TV Prizreni/