Radio Televizioni i Zvicrës (RTS) në gjuhën frenge ka raportuar për vdekjen e pesë anëtarëve të familjes Sadiku në një aksident trafiku që ndodhi të dielën pasdite në fshatin Duhël të Suharekës.
Në artikullin e publikuar sot në uebsajtin e saj, RTS ka theksuar se familja Sadiku jetonte në zonën e qytetit Reinach të kantonit Aargau në Zvicër. Madje, në titullin e lajmit të publikuar nga mediumi publik zviceran shkruhet: “Pesë persona që jetonin në Zvicër vdesin në një aksident në Kosovë”.
“Një aksident rrugor i mori jetën pesë anëtarëve të një familje të dielën në jugperëndim të Kosovës. Viktimat, që jetonin në Zvicër, kishin shkuar me pushime në Kosovë”, raporton RTS.
Po ashtu, Radio Televizioni i Zvicrës raporton se presidenti kosovar Hashim Thaçi u ka shprehur ngushëllime të afërmëve të familjes, përmes një shkrimi në Facebook. /Insajderi.com