Trupa muzikore e Forcës së Sigurisë së Kosovës, nuk do të jetë e angazhuar si formacion komplet gjatë Paradës ushtarake që pritet të mbahet në pasditen e 17 shkurtit.
Në këtë manifestim dedikuar përvjetorit të shtetit, do të jetë i angazhuar vetëm një trumpetist i cili do të performon derisa të bëhen homazhe në vendet e caktuara sipas programit të Këshillit Organizativ ndërqeveritar: në varrezat e dëshmorëve të familjes së komandantit legjendar Adem Jasharit në Prekaz dhe tek varri i ish presidentit të Kosovës Ibrahim Rugova.
“Pjesëmarrja dhe shkalla e angazhimit të Trupës muzikore të FSK-së varen nga programi i Këshillit Organizativ ndërqeveritar për organizimin e manifestimit të shtatë vjetorit të pavarësisë. Ky program nuk e ka paraparë ndonjë angazhim më të madh të Trupës Frymore”, ka deklaruar për KultPlus, drejtori i departamentit për Marrëdhënie me Publikun në Ministrinë për Forcën e Sigurisë së Kosovës, Ibrahim Shala.
Ai shtoi se, Garda Ceremoniale e FSK-së do të jetë e angazhuar gjatë tërë ditës ku shënohet përvjetori i shtatë i shtetësisë së Kosovës, për të bërë homazhe në institucionet shtetërore të vendit.
“Për manifestimin e shtatë vjetorit të shpalljes së Pavarësisë, do të jetë e angazhuar Njësia Ceremoniale e FSK-së në vendet ku do bëhen homazhet, në Kuvend të Kosovës dhe në Hotelin ‘Emerald’ ku do të jetë pritja zyrtare e organizuar nga Presidentja e Kosovës zonja Atifete Jahjaga dhe Kryeministri i Qeverisë së Kosovës Isa Mustafa”, ka pohuar Shala.
Një pjesë e trupës muzikore të Forcës së Sigurisë së Kosovës, është pjesë e Orkestrës Simfonike të Filarmonisë së Kosovës. Ata do të performojnë në mbrëmjen e së martës së 17 shkurtit nga ora 18:00, në sallën e quajtur Beethoven, të hotelit Emerald, ku do të luajnë veprat e kompozitorëve shqiptarë dhe atyre ndërkombëtar.
Në këtë koncert solemn përballë mysafirëve të shumtë, pastaj nomenklaturës politike vendase dhe korit diplomatik ndërkombëtar, Filarmonia e vendit do të interpretojë veprat muzikore shqiptare të kompozitorit Thoma Gaqi “Valle Simfonike”, Valon Beqirit “Në shpirtin e traditës” dhe Çesk Zadeja “Suitë simfonike” e marr nga muzika e filmit të famshëm kushtuar heroit kombëtar Gjerjgj Kastritoti Skënderbeu.
Drejtori i Filarmonisë së Kosovës, Baki Jashari, ka deklaruar për KultPlus, se koncerti protokollar i institucionit kulturor të cilin e drejton ai do të jetë i organizuar nën patronazhin e Qeverisë së vendit, dhe do të jetë pjesa kryesore e manifestimi qendror-kulturor dedikuar përvjetorit të shtatë të shtetësisë së Kosovës.