Lëvizja Vetëvendosje i falënderohet Partisë së Fortë për donacionin e sotshëm prej 10 eurosh. Këtë kontribut të tyrin, Vetëvendosje ka vendosur që ta shpërblejë duke i dhuruar Partisë së Fortë 2 kg dardha.
“Lëvizja Vetëvendosje i falënderohet Partisë së Fortë për donacionin e sotshëm prej 10 eurosh, duke ia dhuruar 2 kg dardha (disa edhe kakiçka) si shenjë mirënjohjeje, të vjela nga aktivistët tonë në plantazhin e sheshit “Nëna Terezë” në Prishtinë, në të cilin Kryetari Lexhendar ka investuar aq shumë kohë, mund, mend dhe këpucë të grisura”, ka shkruar aktivisti i Vetëvendosjes, Fisnik Ismaili, në Facebook.
Poashtu, sipas Ismailit, “zotohemi se këto donacione do të shpenzohen edhe për mbrojtjen e votës suaj”.
Kjo dhuratë e Vetëvendosjes vjen pasi Partia e Fortë, sot, përmes një transaksioni bankar, i ka dhuruar Vetëvendosjes një shumë simbolike prej 10 eurosh, pasi që kjo e fundit ditë më parë kishte dalë publikisht për të kërkuar fonde nga qytetarët.