Anëtarë të kryesisë së Lëvizjes Vetëvendosje mbajtën tubim me aktivistë, anëtarë dhe simpatizantë të Qendrës në Prizren, me ç’rast u shpalosën edhe hapat dhe synimet e Lëvizjes drejt realizimit të Alternativës Qeverisëse të saj.
Sekretari Organizativ i VV-së, Dardan Molliqaj foli për ristrukturimin e Lëvizjes që e ka ngritur nivelin organizativ si dhe e ka bërë Vetëvendosjen subjekt ku njerëzit e gjejnë mundësinë për ndryshim.
“Sot, ata që vijnë në Lëvizje janë të lidhur pas konceptit dhe Alternativës së saj. Lëvizja Vetëvendosje do të angazhojë shumë personalitete nga fusha të ndryshme, për ta bërë ndryshimin”, tha Molliqaj.
Kryetari i Grupit Parlamentar, Visar Ymeri, duke folur për gjendjen aktuale në vend, tregoi se si ky subjekt politik angazhohet që rruga drejt zgjedhjeve të jetë ajo e rrëzimit të Qeverisë, dhe në këtë drejtim që rrëzimi i qeverisë të jetë njëkohësisht kundërshtim i politikave të saj, e jo vetëm i njerëzve në të.
Ai gjithashtu shpjegoi se një mocion mosbesimi për qeverinë duhet domosdoshmërisht ta përmbajë kundërshtimin e marrëveshjes, negociatave dhe koncesioneve ndaj Serbisë, si dhe kundërshtimin ndaj politikave qeveritare të rrënimit të pasurisë publike, të keqpërdorimit të parasë publike, të politikave varfëruese dhe kundërzhvillimore të qeverisë.
Duke folur për kundërshtimin e Lëvizjes Vetëvendosje për praninë e EULEX-it në Kosovë dhe krijimin e Tribunalit për krime të luftës, Visar Ymeri tha se “Vetëvendosje angazhohet që t’i ndërtojmë kapacitetet për luftë ndaj krimit dhe korrupsionit”.
“Për ta ndërtuar një sistem të tillë drejtësie duhet ta kemi një qeveri të pastër dhe me vullnet për një gjë të tillë. Pushtetarët e djeshëm dhe ata të sotshmit nuk e kanë këtë sepse vet do të ishin të akuzuarit nga një gjyqësi e pavarur. Kjo ndërtohet vetëm përmes qeverisjes së pastër, të guximshme, dhe të drejtë”, përfundoi Ymeri.
Kryetari i Komunës së Prishtinës Shpend Ahmeti duke folur për mundësinë e një qeverisjeje të mirë në nivel shtetëror, tha se me fitoren në Prishtinë u dëshmua se mund të fitohet edhe pa para, pa borxhe ndaj dikujt dhe pa i thyer parimet në politikë. Ai tha se vetëm koncepti i drejtë mund ta garantojë një qeverisje të drejtë dhe Lëvizja Vetëvendosje bazohet në konceptin e drejtë për të qeverisur.
Në fund, fjalën e mori kryetari i Lëvizjes Vetëvendosje, Albin Kurti, i cili prezantoi temat kryesore të cilat e përbëjnë Alternativën Qeverisëse të Lëvizjes Vetëvendosje.
“Në alternativën tonë qeverisëse ne kemi bërë një lidhje të ngushtë dhe harmonike midis shtetit të së drejtës, shtetit zhvillimor dhe shtetit social. Besojmë se që të tria këto mungojnë në Kosovë dhe që të tria janë të domosdoshme”, tha Albin Kurti.