Një person nga Brooklyn, SHBA, që kishte vrarë gruan e tij për shkak të dyshimit për tradhti – pak orë para se të hapte një piceri me emrin e tij – ka pranuar fajësinë në Gjykatën Supreme të Brooklynit të hënën.
Hasan “Sammy” Rugova ka pranuar para gjykatësit John Ingram se e ka therur për vdekje bashkëshorten e tij, Gyltene Rugova, nga xhelozia majin e vitit 2014.
Për shkak se pranoi vrasjen, akuza e Rugovës u ul nga Vrasja e shkallës 2 në Vrasje pa paramendim të shkallës 1, dhe do të shërbejë 18 vjet në burg për vrasje.
Rugova, 54-vjeç, i ka ngulur thikën disa herë në qafë dhe gjoks gruas së tij në dhomë të ndejës në apartamentin e tyre në Bay Ridge pasi i kishte kërkuar shkurorëzim, kanë thënë autoritetet, raporton “NewYorkPost”. Më pas ai ktheu thikën kah vetja dhe u vetëther në përpjekje për t’u vetëvrarë. Kur djali i tyre, asokohe 14 vjeç, Ibrahimi, deshi t’ia merrte thikën, ai ishte prerë në parakrah, transmeton Koha.net.
Urdhri i Gjykatës përfshin edhe mbrojtje për katër fëmijët e çiftit, të cilët Rugova nuk lejohet t’i takojë deri më 20 maj të vitit 2045 – që do të jetë edhe 31 vjetori i vdekjes së nënës së tyre.
Rugova, që thuhet se është nga Shqipëria, ka shtetësinë e Amerikës tash e 15 vjet dhe nuk pritet të deportohet kur të nis vuajtjen e dënimit më 9 dhjetor.