Kryeministri Albin Kurti ka kujtuar në 26 vjetorin e rënies, mjekun e shquar të luftës Shpëtim Robaj.
Kurti në shkrimin e tij thekson se Robaj ishte shpëtimtar i shumë jetëve, doktor i plagëve të shumë dëshmorëve dhe të plagosurve gjatë luftës në Kosovë.
“26 vjet më parë, në mes të fshatrave Likoc dhe Abri e Poshtme, më 30 shtator 1998, Shpëtim Robaj u vra nga plagët e shkaktuara nga shpërthimi i një mine të vendosur nga forcat ushtarake serbe. Ai po shkonte për t’i ndihmuar të plagosurit e mbijetuar nga masakra në Abri të Epërme, ku katër ditë më parë, forcat serbe i kishin masakruar 23 civilë shqiptarë të paarmatosur. Ai ishte bashkë me kolegë të tjerë, doktorë vendas dhe nga Kryqi i Kuq Ndërkombëtar, mes të cilëve në atë rast u plagosën mjeku Ilir Tolaj, motra medicinale nga Zelanda e Re, Margaret Braison dhe kolegia e tyre Mirlinda Bunjaku”, shkruan Kurti.
Ai kujton se Robaj ia kishte mjekuar plagët edhe Komandantit Mujë Krasniqi, kishte kuruar plagë civilësh e ushtarësh edhe në Gradicë, Gajrak, Breshanc, Ponorc e Senik.
