Sipas një njoftimi zyrtar nga familja e Armend Hodajt, fondi i kërkuar prej 200,000 eurosh për trajtimin e tij është arritur, falë donacioneve nga brenda dhe jashtë vendit. “Duke llogaritur shifrën momentale që është deponuar në xhirollogarinë zyrtare të Armendit, si dhe paratë e konfirmuara që ende nuk kanë arritur te familja, shumë e kërkuar prej 200,000 euro është arritur,” thuhet në njoftimin e familjes, përcjell PrizrenPress.
Me këtë rast, familja ka kërkuar që të ndërpriten aktivitetet e mbledhjes së fondeve, pasi synimi financiar është përmbushur. “Lusim të gjithë nga ju, që të ndërpritni aktivitetin e mbledhjes së fondeve për Armendin,” u shprehën ata.
Familja gjithashtu bëri të ditur se një njoftim zyrtar për gjendjen shëndetësore të Armendit dhe përfundimin e trajtimit aktual pritet të merret nga spitali deri në fund të javës.
Në fund, familja falënderoi të gjithë ata që u solidarizuan dhe kontribuuan në këtë fushatë. “Ju falenderojmë pafundësisht secilin nga ju, që u humanizuat me ne dhe bëtë çdo sakrificë për të grumbulluar këto para,” përfundon njoftimi.
Ndryshe, Armend Brahim Hodaj (38 vjeç, baba i dy fëmijëve) nga fshati Gjonaj të Hasit, është diagnostikuar me Mixed connective tissue disease with severe pulmonary hypertension. Pas tetë muajsh trajtim në Kosovë, mjekët kanë rekomanduar vazhdimin e trajtimit jashtë vendit, pasi gjendja e tij është përkeqësuar. Aktualisht, ai është transferuar në Institutin për Sëmundjet Pulmonare në Vojvodinë./PrizrenPress.com/
Përjetoni pushime të paharruar dhe dasma magjike në Hotel “Albes Residence”
