Policia e Kosovës ka konfiskuar një automjet të tipit Lamborghini në fshatin Zhur të Prizrenit, pasi ky ishte duke u drejtuar nga një i mitur 11-vjeçar. Rasti ka ndodhur më 21 nëntor 2024, rreth orës 16:05, gjatë patrullimit të rregullt të policisë, përcjell PrizrenPress.
Sipas raportit të policisë, automjeti ishte pa targa dhe drejtuesi i tij ishte një fëmijë i mitur, i cili kishte si pasagjer prindin e tij, babain.
“Automjetin të cilin drejtonte i mituri ishte i modelit Lamborghini pa tabela të regjistrimit, poseduesi i mjetit nuk ka arritur të prezantoj fizikisht asnjë dokument mbi pronësinë e mjetit”, thuhet në njoftimin zyrtar të Policisë së Kosovës.
Prindi i të miturit është gjobitur me një vendim për kundërvajtje, ndërsa automjeti është konfiskuar dhe dërguar në Stacionin Policor të Prizrenit.
Policia e Kosovës thekson përkushtimin e saj për të garantuar sigurinë dhe për të mbajtur rendin dhe qetësinë në komunikacion./PrizrenPress.com/
Përjetoni pushime të paharruar dhe dasma magjike në Hotel “Albes Residence”
