Reshjet intensive të borës në komunën e Dragashit kanë krijuar vështirësi të mëdha në qarkullimin e automjeteve dhe këmbësorëve. Kryetari i komunës, Bexhet Xheladini, përmes një deklarate ka bërë të ditur se ekipet komunale janë angazhuar maksimalisht për pastrimin e rrugëve.
“Që nga orët e hershme të mëngjesit, 4 traktorët e komunës janë në terren dhe po bëjnë përpjekje maksimale për pastrimin e rrugëve nga bora. Ata kanë dhënë prioritet hapjes së rrugëve kryesore të fshatrave, dhe pas stabilizimit të kushteve të motit, do të vazhdojnë me pastrimin e rrugëve të lagjëve”, ka deklaruar Xheladini, përcjell PrizrenPress.
Ai ka falënderuar kompanitë lokale që po ndihmojnë në përballimin e situatës.
“Shfrytëzoj këtë rast t’i falënderoj përzemërsisht kompanitë ‘Behari’, ‘NIKI’ dhe ‘Univerzal Komerc,’ të cilat, pas kërkesës sime dhe me vullnetin e tyre, kanë dalë në terren dhe janë duke pastruar rrugët nga bora”, ka shtuar ai.
Në këtë situatë emergjente, Xheladini u ka bërë thirrje qytetarëve që disponojnë mjete për pastrimin e borës, të japin kontributin e tyre.
“Apeloj te qytetarët që kanë mekanizma për pastrimin e borës të dalin në terren dhe të japin kontributin e tyre për të tejkaluar këtë emergjencë,” ka përfunduar ai.
Komuna ka garantuar se pas përmirësimit të kushteve atmosferike, do të vazhdohet me intensifikimin e punës për hapjen e të gjitha rrugëve./PrizrenPress.com/
Përjetoni pushime të paharruar dhe dasma magjike në Hotel “Albes Residence”
