Zyrtarët e Qeverisë së Kosovës, të cilët do të duhej t’i dërgonin në Kuvendin e Kosovës aktet e nevojshme juridike për hapjen e Gjykatës Speciale, kanë bërë të ditur se nuk ka ndonjë zhvillim konkret në këtë drejtim.
Ndërkohë, vetë procesi është i rrethuar ende me dilema të shumta, që preokupojnë ekspertët juridikë evropianë për shkak të implikimeve të shumta ligjore që ka krijimi i këtij mekanizmi të veçantë gjyqësor, që sipas paralajmërimeve pritet të jetë i vendosur në Holandë, shkruan sot Koha Ditore.
Sipas burimeve të gazetës dilemat kryesore kanë të bëjnë me statutin e Gjykatës, respektivisht nëse do të jetë vendore apo ndërkombëtare dhe ekspertët përkatës janë duke shqyrtuar mundësitë për eliminimin e barrierave juridike, si në raport me legjislacionin e Kosovës, vendit pritës, ashtu edhe atë ndërkombëtar.
Mirëpo, ministri i Drejtësisë së Kosovës, Hajredin Kuqi përmes një sms-je ka bërë të ditur se ende nuk ka asgjë konkrete rreth ligjit apo statutit të Gjykatës Speciale.
Gazeta ka kontaktuar edhe ambasadorin e Holandës në Prishtinë, Robert Bosch, i cili përmes një emaili ka bërë të ditur se “nuk është i përfshirë në këtë çështje” dhe ka sugjeruar që të kontaktohen autoritetet qeveritare të Holandës.