20-vjeçari Sokol Mjacaj ka pranuar para hetuesve në ambientet e policisë së Shkodrës se është autori i vrasjes së dy turistëve çekë, mbrëmjen e së premtes.
Ai ka treguar se u fut në makinën e turistëve, nën kërcënimin e armës, në fshatin Lotaj, shkruan Shqiptarja.
Sipas tij, pranë fshatit Prekal, çeku Michal Svatos tentoi t’ia merrte armën dhe ky ka qenë momenti që ai e ka shkrepur kallashin ndaj të dyve.
Policia ka mundur ta arrestojë Mjacajn rreth orës 16:00 të së dielës, dy ditë pas vrasjes së turistëve çekë, në një aksion të nisur nga mbrëmja e së shtunës, ku morën pjesë më shumë se 300 policë.
20-vjeçari Mjacaj, lindur dhe banues në fshatin Lotaj të Dukagjinit, u kap në një shtëpi dykatëshe në fshatin Grudë e Re. Ai kishte vuajtur një dënim prej 5 vjetësh, për pjesëmarrje në vrasjen e një 11 vjeçari, për një varëse floriri.