Në kuadër të promovimit të veprës së tij, “Prijës fetar dhe shpirtërorë të shqiptarëve – Bashkëjetesa ndërfetare dhe kontributi i tyre kombëtar”, autori Faton Mehmetaj, sot në Malishevë, e ka bërë promovimin e këtij libri, i cili u cilësua si një libër monumental i tolerancës ndërfetare të popullit shqiptar.
Kryetari i Komunës së Malishevës, Ragip Begaj, duke folur rreth kësaj vepre dhe tolerancës ndërfetare, tha se populli shqiptar, gjithmonë ka qenë popull i sakrificave, por religjionet tek ne, asnjëherë nuk kanë krijuar urrejtje, por përkundrazi, pasi besimi nuk e lejon urrejtjen.
“Çdo vepër e shkruar është e mirëseardhur, në veçanti veprat e këtilla, që kanë për qëllim t’i bashkojnë njerëzit”, tha Begaj.
“Mbledhja e 600 biografive të prijësve shpirtëror shqiptar është punë e madhe, por në autori në mënyrën më të mirë e ka përshkruar tolerancën ndërfetare”, tha recensenti i librit, Ahmet Qeriqi.
Ndërsa, për recensentin Fahredin Shehu “ky libër është monumental për edukimin shpirtëror dhe i tolerancës ndërfetare”.
“Kjo që kam bërë, është një pikë uji në oqean, pasi qindra vite për ti studiuar të gjithë ata prijës shqiptar, që kanë kontribuar në çështjen kombëtare dhe në ruajtjen e tolerancës ndërfetare të popullit shqiptar, gjë na bën të jemi unik në bashkëjetesën fetare”, tha autori, i cili i falënderoi të gjithë ata që e kanë përkrahur në hulumtimin, pastaj botimin dhe tani promovimin e librit. /PrizrenPress.com/