Një nga sfidat më të rënda që e presin Kuvendin e Kosovës, në këtë sesion të ri pranveror, përveç ballafaqimit me situatën e krizës për shkak të marrëveshjeve të 25 gushtit, Asociacionin dhe demarkacionin e kufirit me Malin e Zi, gjithsesi do të jetë edhe finalizimi i funksionalizimit të Gjykatës Speciale, proces që kërkon ratifikimin e marrëveshjes me shtetin e Holandës.
Analisti politik Nexhmedin Spahiu konsideron se është tepër e domosdoshme që pasi kanë kaluar ndryshimet kushtetuese dhe Ligji për themelimin e Gjykatës Speciale, dhomave të specializuara dhe ai për ndihmën juridike ndaj të akuzuarve potencialë, që të tejkalohet çdo dilemë dhe mëdyshje rreth ratifikimit të marrëveshjes edhe me Holandën.
“Jemi në prag të cilësimit si shtet i dështuar. Me këtë rast opozita do të mund ta tregonte patriotizmin e vet, siç e ka treguar edhe me rastin e vizitës së presidentit austriak, kur e ndërpreu pengimin e punës së Parlamentit dhe mundësoi fjalimin e tij”, tha Spahiu për Kosova Sot.
Ndërkaq, analisti politik Blerim Burjani thotë se sado që mund të ketë hamendje dhe rezistencë te një masë e konsiderueshme e deputetëve për ta votuar ratifikimin e marrëveshjes me Holandën, kjo situatë vlerësohet pa alternativë. /Kosova Sot