Siguria e nxënësve në shkollat e Prizrenit nuk është e mirë.
Kryetari i Këshillit të Bashkësisë Islame Besim Berisha, tha se ndjehet i shqetësuar për shumë raste të dhunës, ku janë të përfshirë vetë nxënësit.
Në mbledhjen e Këshillit Komunal për Siguri në Bashkësi në Prizren, është përmend edhe rasti i dyshimit të tentim-kidnapimit e një nxënëseje boshnjake.
Drejtori i Policisë, Nexhmi Krasniqi, tha se pas pranimit të informatës dhe në konsultim me Prokurorin, kanë nisur hetimin e rastit.
“Dyshohet se informacioni i dhënë mund të jetë lansuar për qëllime politike. Lidhur me këtë rast, policia e Prizrenit ka deponuar kallëzim penal në prokurori për deklarim të rrejshëm”, ka thënë Krasniqi.
Gjatë intervistave me të përfshirët në rast nuk janë konfirmuar pretendimet e zyrtarit të arsimit Allmir Saiti , për tentim të rrëmbimit të nxënëses.
Ndërkaq, drejtuesit e Partisë së Re Demokratike (NDS) i kanë bërë thirrje Prokurorisë Themelore që rastin e tentativë rrëmbimit të një nxënëseje boshnjake, që ndjek mësimin në shkollën e mesme të mjekësisë “Luciano Motroni” në Prizren, ta ndjekin në mënyrën e duhur, pa e heshtur dhe pa e orientuar në drejtim tjetër.
Njëherësh, përfaqësuesit e këtij subjekti politik të komunitetit boshnjak, kanë kërkuar që edhe kryetari i Komunës së Prizrenit, Ramadan Muja të mos përzihet në këtë rast deri në përfundimin e hetimeve./PrizrenPress.com/