Skuadra e Feronikelit ka shënuar fitore të rëndësishme si mysafire duke e mposhtur Lirinë në Prizren me rezultat 1-3.
Mysafirët e filluan furishëm takimin duke shënuar që nga minuta e dytë me anë të Mendurim Hotit, derisa në minutën 10’ Diar Prokshi e dyfishoi epërsinë.
Tre minuta më vonë, nigeriani i Lirisë, Chibueze Odi shënoi për ta ngushtuar disavantazhin e skuadrës së tij.
I njëjti shënoi edhe njëherë në minutën 28’, por që ky gol u anulua nga gjyqtari i takimit për shkak të pozitës jashtë loje.
Në pjesën e dytë Feronikeli pati një tjetër rast të mirë me anë të Mark Milicaj, goditja e të cilit u ndal në shtyllë, ndërsa rezultatin përfundimtar e përcaktoi sulmuesi i inkuadruar në lojë, Mevlan Zeka, që e shfrytëzoi gabimin e mbrojtjes prizrenase dhe shënoi pasi e dribloi edhe portierin Armend Blakqori.