Është ndërprerë për disa ditë spërkatja e zonave të rrezikuara nga pickimi i rriqrave në rajonin e Malishevës. Ndërprerja është bërë pas reagimit të Shoqatës së Bletarëve të Kosovës, sipas së cilës, janë dëmtuar rreth 40 deri në 50% shoqëri të bletëve, si pasojë e kësaj spërkatjeje.
Kreu i Shoqatës së Bletarëve të Kosovës, Salih Bytyçi, thotë se ata nuk u njoftuan paraprakisht për efektet e kësaj spërkatje dhe gjithashtu nuk u njoftuan as për kohën e spërkatjes, raporton KTV. Bytyçi thekson se nëse kjo spërkatje do të vazhdojë edhe gjatë viteve të ardhshme ashtu siç është e kontraktuar kompania, atëherë dëmi në bletari do të jetë shumë i madh.
Përfaqësuesit e kompanisë “Truly Nolen” nuk e mohojnë se në fazën e parë të spërkatjes janë dëmtuar bletët, por, siç thonë ata, nuk ekziston rreziku i zhdukjes së kolonive të tyre. Madje, ata paralajmërojnë se në të ardhmen do të mund të ketë ende dëme në bletë, si shkak i spërkatjes.
Alban Gunga thotë se që nga e hëna do të vazhdojë faza e dytë e spërkatjes së fshatrave në rajonin e Malishevës. Deri më tani janë spërkatur fshatrat Astrazub, Dragobil, Burim dhe Balincë.