Përkrahja dhe optimizmi për fitoren e radhës së PDK-së në Prizren, karakterizuan javën e parë, pas përcaktimit të kandidatit të ri për të parin e Prizrenit, Shaqir Totajn.
Dy muaj para kohës së përcaktuar për mbajtjen e zgjedhjeve lokale, subjekti më i madh në Prizren, PDK ka shtuar takimet e strukturave dhe të grupeve me kandidatin e ri për postin e kreut të komunës.
Totaj, që ka përkrahjen e madhe nga lideri i partisë, Kadri Veseli dhe të degës në Prizren, në ditët e para të punës në kuadër të takimeve të organizuara me struktura të partisë, por edhe grupe të ndryshme të qytetarëve, Totaj ka marrë përkrahje të madhe, ndërkohë që ky hap i PDK-së është mirëpritur edhe tek qytetarë të papërcaktuar, të cilët ia duan të mirën Prizrenit.
“Emërues i përbashkët në takimet e deritashme të mbajtura me z.Totaj është ofrimi dhe mbështetja ndaj Totajt dhe PDK-së, duke potencuar interesin e qytetit dhe investimet e mëdha të bëra nga ky subjekt për një decenie, duke bërë që Prizreni të jetë një qytet model, jo vetëm në vend, por edhe në rajon”, thuhet në njoftimin e degës së PDK-së.
Deri tash Totaj ka pasur takime me kryesitë e nëndegëve dhe me kandidatët e PDK-së për anëtarë të Kuvendit Komunal (KK). Në vijim ai do të mbajë takime edhe në terren, duke takuar edhe nëndegët si dhe degën e Zhurit dhe atë të Hasit./PrizrenPress.com/