Me ftesë të pronarëve të kompanisë “ Abi Çarshia”, të shtunën është mbajtur një protestë paqësore në ambientët e këtij kompleksi afarist, pas rrënimit të disa objekteve nga Inspektorati i Prizrenit në këtë kompleks ditën e premte.
Pjesë e kësaj protestës ishin punëtorë të kompanisë, biznese të cilat e ushtrojnë veprimtarinë e tyre në këtë kompleks, përfaqësues të partive politike dhe qytetarë. Avokati i kompanisë, Taulant Hodaj, edhe një herë tha se veprimi i djeshëm i Inspektoratit ka qenë i kundërligjshëm, pasi që sipas tij, nuk janë respektuar vendimet që duhej zbatuar në radhë të parë atyre të ministrisë së Mjedisit.
Përfaqësuesit e punëtorëve të kësaj kompanie dhe bizneseve që e ushtrojnë veprimtarinë në këtë kompleks, thanë se veprimi i djeshëm i komunës së Prizrenit, ju ka sjellur dëme të mëdha atyre dhe kërkojnë që në radhë të parë kryetari , Mytaher Haskuka, të angazhohet në zgjidhjen e kësaj çështje jetike për ata, u shprehen Dritan Sahatçiu, Bertan Bytyçi dhe të tjerë.
Në mbështetje të kësaj proteste, kishin dalur edhe zyrtarë të degës së AAK-së dhe PDK-së në Prizren. Punëtorët e kësaj kompanie, shprehen shqetësimet e tyre se me veprimin e djeshëm të komunës së Prizrenit, po iu rrezikohet vendi i punës dhe sigurimi i mirëqenies për familjet e tyre.
Ndryshe, gjatë ditës së djeshme, Inspektorati ka rrënuar disa objekte në këtë kompleks, aksion ky që është përshkruar me shumë kundërshtime nga pronarët e kompanisë.
Gjatë ditës së sotme nuk kanë vazhduar aktivitetet për vijimin e rrënimeve në objekteve në këtë kompleks, me ç’rast drejtori i Inspektoratëve, Islam Thaçi, tha se i është dhënë mundësi bizneseve që e ushtrojnë veprimtarinë e tyre në këtë kompleks të largojnë inventarin nga objektet ku parashihen të ekzekutohen rrënime./tvprizreni.info/