Kryetari i Lëvizjes Vetëvendosje! Albin Kurti, kërkoi në Gjonaj të Hasit, që të mbështetet kandidati për kryetar të Prizrenit, Arbër Rexhaj. “Vetëm e reja mund ta përmbysë të vjetrën e padrejtë”, tha Kurti.
Sipas tij, VV-ja do të krijojë kushte dhe ambient më të mirë që investimet dhe remitancat e shqiptarëve jashtë shtetit, të jenë në funksionin të zhvillimit të gjithëmbarshëm shoqëror dhe ekonomik.
Deputeti i Kuvendit të Kosovës Afrim Kasolli tha se një pjesë e konsiderueshme e banorëve të Gjonajt, si pasojë e kushteve të rënda ekonomike janë detyruar të largohen nga vendi për një jetë më të mirë. “Pavarësisht kësaj, ata asnjëherë nuk e ndalën kontributin e tyre për Hasin dhe Kosovën. Remitancat si burim kryesor i të ardhurave për këtë rajon, si rezultat i mungesës së një politike mbështetëse nga pushteti, vazhdojnë të humbin mundësitë për zhvillim. Me Lëvizjen Vetëvendosje ! anashkalimi, injorimi dhe mospërfillja e juaj do të merr fund”, tha Kasolli.
Ndërsa kandidati për kryetar të Prizrenit, Arbër Rexhaj tha se mbështetja e Lëvizjes Vetëvendosje! është zgjidhja e vetme për problemet e përditshme që e brengosin qytetarin e Komunës së Prizrenit. “Deri më tani ne ishim zëri juaj jashtë institucioneve të pushtetit lokal. Përmes angazhimit dhe kritikës tonë jemi munduar që ta denoncojmë padrejtësinë dhe t’i mobilizojmë qytetarët kundër saj. Tani kërkojmë besimin tuaj që të bëhemi zëri dhe vullneti juaj edhe brenda institucioneve. Sepse vetëm bashkë është e mundshme!”, tha Rexhaj./PrizrenPress.com/