Shkruan: Naim Qelaj
Nuk kam shkruar me parë për gazetë. Nuk i leverdis as profesionit tim, por po marrë guximin nga kanosja e një të ardhme të zymtë.
Partitë politike në Prizren kanë hyrë në fushatën zgjedhore të zgjedhjeve lokale me problem të shumta dhe mungesë lidershipi, në mungesë të një vizioni të qartë dhe pa programe zgjedhore.
Fushata e sivjetme zgjedhore ngjason me shfaqje cirku ku persona të njëjtë nga zgjedhjet e kaluara mundohen të promovojnë ide të njëjta pa pikë frymëzimi, të zbehura nga dështimi e pse jo edhe të mbushura me gënjeshtra e pallavra që janë bërë demode dhe nuk u beson askush. Mbi të gjitha , të njëjtat nuk i besojnë edhe vetë ata që i thonë.
Kjo mungesë vizioni dhe ideve kreative, tregon krizën me të cilën po përballet klasa politike në komunën e Prizrenit dhe në gjithë Kosovën.
Partitë që kanë qeverisur këtë komunë, kanë rikandiduar të njëjtit kandidat të cilët nuk kanë çfarë të ofrojnë për qytetarët dhe komunën sepse secili prej tyre së pari duhet të përballet me gabimet, dështimet dhe shkeljet ligjore që kanë bërë gjatë mandateve paraprake.
Kryetari aktual përballet me problem serioze sa i përket mungesës së aftësive menaxhuese ngase gjatë gjithë periudhës qeverisëse të tij ka qenë “ kukull” në duart e grupeve të ngushta dhe klaneve të interesit dhe asnjëherë nuk ka arritur të krijoj imazh të kryetarit. Ai vetëm luajtur rolin e një servili që e shet vetën pa pardon.
Kësisoj stafi i tij ka bërë shkeljet ligjore. Shumica e drejtorëve të drejtorive aktuale përballën me akuza të konfirmuara për shkak të keqpërdorimeve të shumta me detyrat zyrtare dhe me abuzimin me paranë publike. Aktakuzë ka edhe për kryetarin, ndonbëse qyteti e di se ai ka qenë vetëm “kukulla” që ka nënshkruar, e asnjëherë personi vendimmarrës.
Profesori i moshuar, me shëndet të shembur e më aktakuzë të konfirmuar është në hall të madh.
I detyruar që të i`u shmanget debateve publike, mban takime zgjedhore të tipit komunist, ku nuk mungojnë lëvdatat e ndërsjella për të “arriturat” në mandatin e tij, e që tek qytetari i komunës ngjall ndjenjën e mllefit. Ky mllef vjen natyrshëm kur dihet gjendja në të cilën ndodhet qytetari sot. Qytetarit të pashpresë, me probleme sociale, me qytet të degraduar politika ua premton “Prizrenin Evropian”.
Si për ironi, mbështetja më e madhe për vizionarët që thonë se e ofrojnë Evropën, u vjen nga lindja.
PDK-në në Prizren e mbështet lindja, Turqia dhe Erdogani por jo Evropa. Evropa i pati porositur që të mos kandidojnë njerëzit e akuzuar për korrupsion, por këta nuk e dëgjuan.
Nga ana tjetër, kemi kandidatin e LDK-së që mendohet të jetë alternativa e kryetarit aktual.
Ai është përgjegjës për shumë skandale që lidhen më të e që janë pasojë e veprimeve të pa ndërgjegjshme të tija. Fushatën e ka nisur me mesele e barcoleta dhe jam i sigurt që po me këto barcoleta edhe do ta mbyll. Ky njeri tallet me qytetarin kulturën, traditën dhe është i pa përgjegjshëm në raport me vet subjektin e tij politik prandaj shtrohet pyetja si mund të jetë serioz me komunën.
Degraduesi i “Prevallës”, përgjegjësi i zhdukjes nga zjarri i dokumentacionit kadastral, ofron ofertë qeverisëse duke menduar se populli harron!!
Nuk ka antivlerë më të madhe se kjo që i ofrohet nga këta dy kandidatë Prizrenit. Nuk di ku gjejnë forcën morale të dalin e të kërkojnë besimin e nëpërkëmbur sa herë nga vetë këta individ të cilët në vend që të përballën dhe të japin përgjegjësi kërkojnë të vazhdojnë gabimet e tyre.
Kjo mungesë e lidershipit politik, në këto zgjedhje lokale në Prizren, kanë ndikuar që partitë tjera rivale sidomos Koalicioni për Prizrenin të AAK-LDD-së dhe kandidati i përbashkët Lulzim Kabashi. Ai dhe të tjerët e partive tjera po përballen në fushatë me Hashim Thaçin e jo me Ramadan Mujën. Me simbolikën e ish presidentin Ibrahim Rugova e jo me Eqrem Kryeziun. Këtë fakt më së miri e vërteton fushata që po bënë kryeministri i Kosovës në Prizren. Shefi i qeverisë këto ditë është degraduar duke e ushtruar praktikisht rolin e shefit të shtabit të Ramadan Mujës. Ai me militantët në mënyrë të turpshme “pushtuan “ Shtëpinë e Lidhjes dhe nga aty dhanë mesazhin më të keq se ky kryeministër nuk zgjedhë rrugë dhe metoda për të arritur synimet e tij.
Populli nuk e duron këtë hipokrizi dhe turp që po bëhet në emrin e tij, prandaj duhet të vijë momenti i ndëshkimit, momenti i gjykimit të atyre që kanë luajtur dhe janë tallur me ne, e ky gjykim e ndëshkim është vota kundër atyre që po tallën me ne që 14 vite.
Kosova nuk meriton këtë klasë politike, nuk meriton këtë lidership. Prizreni nuk meriton qeverisje nga pensionistë që kanë dështuar në politik, që me keqqeverisjen e tyre kanë degraduar vlerat me te cilat mburrej qyteti. Nuk meriton krrokëritjen e atyre qe luftojnë për mbijetesë politike. I duhet një vizion i ri, një energji e re që i jep shpresë qytetarit për të ardhme të sigurt, zhvillim e mirëqenie.
(Autori është avokat nga Prizreni. Ky shkrim është bërë për gazetën Tribuna)