Deputeti Fatmir Limaj ka reaguar të martën pas shkrimeve në media se takimi i tij me kryeparlamentarin e Shqipërisë, Ilir Meta ka pasur për qëllim ndërmjetësimin mes Limajt dhe Thaçit. Limaj demantoi një gjë të tillë, duke thënë se takimi i tij me Metën, ka qenë kryekëput takim mes miqve.
“Pas disa shkrimeve në mediat tona dhe për hir të sqarimit të opinionit publik ju njoftoj se kryetari i Parlamentit të Shqipërisë, njëherësh miku im z.Ilir Meta ka qenë të dielën për të më vizituar dhe gjatë kësaj dite edhe kemi drekuar në Prizren. Vizita ka qenë private, për të më uruar për përfundimin e rastit gjyqësor dhe nuk ka pasur asnjë qëllim tjetër, siç është spekuluar në media, përveç se takim mes miqve që një kohë të gjatë nuk kemi pas mundësi të shihemi për shkak të rrethanave të cilat edhe janë të njohura për ju”, shprehet Limaj.
Ai falënderoi Metë për vizitën, ndërsa shprehu keqardhje që këtë vizitë private dikush ka dashur me qëllim ta keqinterpretoj.