Ekspozita e LiveART i është prezantuar publikut në Durrës më 31 tetor, ku janë ekspozuar 26 punët finaliste, të cilat për një muaj qëndronin të ekspozuara në Tiranë në Galerinë Kombëtare të Arteve. Organizator i ekspozitës është Intesa Sanpaolo Bank Albania, e cila në këtë rast ka bashkëpunuar me bashkinë e Durrësit.
Gjatë çeljes së kësaj ekspozite ceremonia e hapjes dhe fjalimi u mbajtën nga Z. Alberto Prestopino, Drejtori i Divizionit të Retail i Intesa Sanpaolo Bank Albania. Ai theksoi impenjimin e Bankës në iniciativa që nxisin e promovojnë kulturën e artin duke mbështetur veçanërisht të rinjtë e talentuar shqiptarë, duke vënë kështu në jetë parimet e Përgjegjësisë Sociale të Korporatës, në zbatim të vlerave ku Banka bazon punën e saj të përditshme, shkruan gazeta Shqiptarja.
Eventi dhe ceremonia e hapjes së ekspozitës, u nderua nga prezenca e Kryetarit të Bashkisë së Durrësit, Z. Vangjush Dako dhe Prefektit i Durrësit Z. Roland Xhelilaj. Gjatë fjalës së tij, Z. Dako e konsideroi këtë projekt një shprehje të rëndësishme të fuqisë artistike të Shqipërisë dhe shembull pozitiv të asaj që mund të arrihet në partneritet me sektorin privat.
Ai theksoi se Moto e Qytetit te Durrësit është “ARTI ËSHTË MBIEMRI IM”. Nderoi eventin me pjesëmarrjen e tij Drejtori i Galerisë Kombëtare Z. Artan Shabani. Ekspozita do të qëndrojë e hapur për publikun në ambientet e Galerisë së Qytetit “Nikolet Vasia” deri në 10 Nëntor 2013.