Në mungesë kuorumi pasi një pjesë e opozitës nuk mori pjesë në mbledhje dhe një pjesë më pas i braktisi punimet, Kuvendi i Prizrenit nuk ka miratuar rishikimin e buxhetit komunal për vitin 2020.
Seanca urgjente e Kuvendit të Prizrenit, me një pikë të vetme të rendit të ditës, shqyrtimi dhe miratimi i rishikimit të buxhetit për vitin 2020 nisi në mungesë të anëtarëve të partisë më të madhe në organin më të lartë legjislativ komunal, atyre të PDK-së.
Pas fjalimit të drejtorit për Ekonomi dhe Financa, Furkan Ergyler, i cili tha se dikasteri që drejton ai ka hartuar një material të kompletuar për aprovim, fjalën e mori shefi i GK të LDK-së, Haziz Hodaj, i cili pati kritika për shkak të mungesës së konsultimeve rreth hartimit të buxhetit për pjesën e mbetur të vitit, dhe neglizhencës së vazhdueshme për çështje të këtilla nga partia në pushtet. Pas fjalimit të tij, kuvendarët e LDK-së braktisen punimet e kësaj seance.
Më pas, fjalën e mori shefi i GK të AAK-së, Ilir Baldedaj, i cili tha se propozim vendimi për rishikimin e buxhetit është puro politik. Pas fjalimit të tij, edhe kuvendarët e AAK-së braktisen punimet e kësaj seance.
Ndërkaq, me vërejtje rreth këtij propozim vendimi pati edhe kuvendari i Nisma-s Socialdemokrate, Shukri Quni. Pas fjalimit të tij, edhe kuvendarët e Nisma-s u larguan nga salla.
I ndodhur para një numri të vogël kuvendarësh të pranishëm në sallë, kryetari i komunës, Mytaher Haskuka, tha se mos votimi i rishikimit të buxhetit pamundëson zhvillimin e Prizrenit, sidomos në këtë tejet të vështirë si pasojë e pandemisë Covid-19.
Në mungesë kuorumi, seanca është shpallur e mbyllur.
/TV Prizreni