Shkarkimi i Maurizio Sarri ishte hapi i parë, drejt një revolucioni te Juventusi. Në Itali janë të bindur se ën kampin bardhezi ndryshimet do të jetë të shumta, jo thjesht se në krye të ekipit u emërua Andrea Pirlo. Duhet gjak i ri dhe te Juventusi menduan të zëvendësojnë fillimisht Miralem Pjanic me Arthur Melo.
Blaise Matuidi është lojtari tjetër që i ka bërë gati valixhet, edhe pse në klubin bardhezi tani vonë ia rinovuan kontratën. Juventusi kërkon të krijojë një fond për merkaton dhe largimet, apo kursimet nga pagat do e përmirësojnë situatën financiare.
200 milion euro synon Juventusi të shpenzojë për përforcimet, ndërkohë që në Torino duhet të zgjidhin çështjen e kontratave me lojtarë si Gonzalo Higuain dhe Sami Khedira. Pagat e tyre janë të larta, 7.5 dhe 6.5 milion euro neto. Deri më tani ka qenë e vështirë të gjenden blerës për këta lojtarë, ndaj edhe thjesht kursimi i pagës shikohet si një lëvizje e mirë.
Douglas Costa dhe Federico Bernardeschi mund të sjellin të ardhura te klubi italian. Të dy së bashku kushtojnë 70 milion euro dhe Juventusi shpreson t’i shesë të dy. Lista është më e gjatë dhe në kampin bardhezi mendojnë të shesin edhe lojtarë si Ramsey, Rugani e De Sciglio. Supriza mund të jetë edhe Alex Sandro dhe Danilo, emra për të cilët te Juventusi po mendohen mirë.