Gjendja shëndetësore e zyrtarit të Policisë së Kosovës, Artur Mrasori, i cili mbrëmjen e 28 janarit, u lëndua rëndë gjatë një aksionit antidrogë të Policisë, duket se po shkon drejt përmirësimit.
Mrasori do të kthehet të enjten në Kosovë.
Këtë e ka bërë të ditur motra e Mrasorit përmes një postimi në Facebook.
“Ju njoftoj që nesër (03.09.2020) në ora 18:00 Arturi pas shtatë muajve qëndrim në Turqi do të kthehet në Kosovë për një pauzë, për të vazhduar përsëri më vonë trajtimin mjekësor. Faleminderit mjekëve kujdestarë të QKUK- së që atë natë janari dhanë gjithçka nga vetja për shëndetin e Arturit, faleminderit dhe Policisë së Kosovës për mbështetjen e pakursyer”, ka shkruar Qëndresa Mrasori.
Artur Mrasori u lëndua rëndë mbrëmjen e 28 janarit gjatë një aksioni të policisë në fshatin Zhur të Prizrenit. Në këtë aksion, nga eksplozivi mbeti i vdekur pjesëtari i Policisë së Kosovës, Sami Thaçi, ndërkaq përveç Arturit, edhe dy zyrtarë të tjerë të policisë mbetën të lënduar./Express/