Nënkryetari i Partisë Demokratike të Kosovës (PDK), Shaqir Totaj ka thënë se aktualisht si subjekt politik nuk e kanë ndërruar qasjen në raport me mundësinë e futjes në Qeveri.
Ai në Frontal të T7 ka thënë se PDK-ja nuk ka marrë ende një vendim për këtë, duke aluduar se momentalisht janë për të qëndruar në opozitë. Por, Totaj nuk e përjashton krejtësisht mundësinë që PDK-ja të përfshihet në koalicionin qeverisës.
“Qëndrimi ynë është parimor dhe PDK-ja nuk merr vendime ad-hoc. Qasja jonë është e njëjtë siç ka qenë… Mundësinë nuk e përjashtoj as unë, por se s’ka vendim për të hyrë në Qeveri”, tha Totaj.
Marrëveshja për zgjedhjen e presidentit të ri, sipas Totajt duhet të presupozojë përfundimin e plotë të mandatit të Qeverisë.
“Nëse do të arrihet një marrëveshje, e presupozon përfundimin e mandatit deri në vitin 2023. Marrëveshja për presidentin do të duhej të ishte marrëveshje gjithpërfshirëse për përfundimin e mandatit”, tha ai.
Për ambicien e kryetarit të AAK-së, Ramush Haradinajt për t’u bërë president, Totaj tha se kjo është më shumë çështje që varet nga dy partitë e mëdha të vendit. /GazetaExpress/
Totaj: Hoti nuk ka pavarësi në vendimmarrje
Nënkryetari i Partisë Demokratike të Kosovës, Shaqir Totaj, thotë se kryeministri Hoti nuk ka pavarësi në vendimmarrje.
Këtrë koment e ka dhënë në emisionin “Frontal” në T7, teksa flet për shkarkimin e dejtorit të Policisë, ATK-së dhe Doganës.
Sipas tij, kryeministri Hoti nuk e anashkalon nga vendimarrja kryetarin e partisë Isa Mustafën.
“Mustafa është një faktor që Hoti nuk mund ta anashkalojë në vendimmarrje, edhe pse kjo nuk do të duhej të ndodhte. Do të duhej të kishte pavarësi në vendimmarrje e këtë nuk po e shohim”, tha Totaj, transmeton Gazeta Express.
Ndërsa, sa i përket shkarkimit të drejtorit të ATK-së, Totaj tha “për fat të keq kemi të bëjmë me një histori të ndërhyrjeve politike të LDK-së në ATK”, tha ndër të tjera ai.