Mesfushori gjerman i Real Madridit, Toni Kroos i cili në të kaluarën ka luajtur edhe për Bayern Munich, ka folur për këta të fundit në prag të sfidës ndaj Borussia Monchengladbach në Ligën e Kampionëve, transmeton Insporti.
Toni Kroos, i cili ishte instrumental në fitoren e xhiros së kaluar ndaj Barcelonës në El Clasicon e zhvilluar në Camp Nou, ka folur rreth ish skuadrës së tij, Bayern Munich.
Ai ka bërë krahasimin mes dy klubeve, duke thënë se Bayern Munich është aktualisht klubi më i mirë në botë por që beson se Real Madrid do të kthehet në atë nivel shumë shpejt.
“Në muajt e fundit, Bayerni ka qenë skuadra më e mirë në botë. Nëse shikon rezultatet, mënyrën si kanë luajtur dhe fitimi i Ligës së Kampionëve. Duhet ta pranosh që disa klube janë më të mira se ti”.
“Por ne e kemi kaluar këtë. Mes viteve 2016 dhe 2018 ne ishim klubi më i mirë në botë. Është normale që nuk mund ta mbash atë nivel për dhjetë vite radhazi pasi ka shumë klube me kualitet” – u shpreh ai.
Real Madrid luan sfidën e dytë në grupin B të Ligës së Kampionëve në udhëtim ndaj Borussia Monchengladbach.
Ky takim zhvillohet sonte (e marte), nga ora 21:00./Insporti.com/