Ideja e kryeparlamentarit, Jakup Kransiqi, për krijimin e një qeverie teknike nuk është mbështetur nga spektri politik në vend. Madje, zyrtarët e forcave politike konsiderojnë se vendi nuk guxon të lëshohet në aventura dhe eksperimente të tilla, e cila nuk ofron zgjidhje. Sipas tyre pranverën që vjen Kosova duhet të futet në zgjedhje të parakohshme nacionale.
Kreu i Kuvendit të Kosovës, Jakup Krasniqi, së fundmi doli me një ide për krijimin e një qeverie teknike, propozim ky që nuk është mirëpritur nga partitë politike në vend. Në një intervistë dhënë “Zërit”, Krasniqi ka thënë se në këtë fazë të zhvillimeve politike në Kosovë, zgjedhja më e mirë do të ishte krijimi i një qeverie teknike.
Por, drejtues të partisë në pushtet vlerësojnë se vendi nuk guxon të lëshohet në eksperimente të tilla.
Nënkryetari i Partisë Demokratike të Kosovës (PDK), Adem Grabovci, ka elaboruar se grupi i tij parlamentar është kompakt dhe se në këtë drejtim, ka shtuar ai, gjitha vendimet e qeverisë janë shqyrtuar dhe aprovuar nga votat shumicë të partnerëve të koalicionit.
“Deri më tani asnjë vendim i qeverisë s’ka mbetur pa u shqyrtuar dhe pa e marrë aprovimin e Kuvendit. Nuk ka asnjë arsyeje të kemi qeveri teknike, pasi që institucionet e vendit janë stabile dhe funksionale, duke e kryer funksionin e vet. Ajo çka dua të theksoj është se GP i PDK-së zyrtarisht i ka 33 deputetë dhe kur kësaj ia shtojmë edhe numrat e deputetëve të partnerëve të koalicionit them se nuk ka ndonjë krizë, ndonëse është në ndershmërinë e secilit deputet që t’i kryejë përgjegjësitë që i takojnë”, ka thënë ai./Zëri/