Në raundin e dytë të votimeve për zgjedhjet lokale, i cili do po zhvillohet sot, rrjeti i organizatave joqeveritare “Demokracia në Veprim” ka angazhuar rreth 1600 vëzhgues, të cilët do të raportojnë për çdo parregullsi që do ta vërejnë në qendrat e votimit.
Shqipe Pantina, anëtare e Bordit të “Demokracisë në Veprim”, gjatë një interviste për gazetën “Zëri” bën të ditur se ky rrjet i OJQ-ve do t’i publikojë rezultatet preliminare për shtatë komunat më të mëdha të vendit dy orë pas mbylljes së vendvotimeve, përkatësisht rreth orës 21:00 të ditës së diel.
Ajo thotë se kërkohet një efikasitet më i madh i Komisionit Qendror të Zgjedhjeve dhe shprehet e zhgënjyer me faktin se si ky institucion edhe pas një muaji, nga raundi i parë i votimeve, nuk ka publikuar rezultatet për asambletë komunale.