Në Ditën Ndërkombëtare për personat me aftësi të kufizuara, këta të fundit, kanë marshuar rrugëve të Prishtinës për të kërkuar dhe paraqitur të drejtat e tyre elementare.
Afrim Maliqi, kryetar i HANDIKOS-it gjatë një fjalimi në sheshin “Ibrahim Rugova” tha se, në Kosovë persona me aftësi të kufizuar janë me përplot pengesa.
Kurse Pranvera Syla përfaqësuese e kësaj organizate dha vërejtje për institucionet e vendit për siç tha ajo mos përmbushjen e kërkesave primare për këtë kategori.
“Sipërfaqet nëpër rrugë janë jo të rrafshëta, jo të shfrytëzuara. Lartësia është tejet e madhe e bankomatëve të bankave”, ishin ndër vërejtjet që i shpalosi Syla.
Ndërsa Fatmire Osmani e cila është asistente e djalit të saj me aftësi të kufizuara, tha për Indeksonline se 100 euro pagesë mujore, nuk iu dalin për të përmbushur kërkesat e djalin të saj.
“Marre duhet me ju ardhë prej qeverisë e deri tek presidentja e vendit që nuk po u bjen ndërmend aspak për kategorinë më të lënë anash në Kosovë”, tha Osmani.
Gjatë këtij tubimi, pjesëmarrës ishte edhe kryetari i ri i Prishtinës, Shpend Ahmeti.