Trajneri francez, Christophe Galtier, do ta marrë drejtimin e skuadrës Paris Saint Germain.
Sipas asaj që shkruan “L’Equipe”, Parisi është shumë pran nënshkrimit me trajnerin 55 vjeçar, i cili në sezonin e kaluar udhëhoqi skuadrën e Nice.
Pra, menjëherë pas refuzimit të Zinedine Zidane që të bëhet trajner i kryeqytetasve, drejtuesit e klubit menjëherë punuan për ta zëvendësuar trajnerin aktual, Mauricio Pochettino-n.
Galtier ka kontratë me skuadrën e Nice edhe për dy vite, por mediumi i lartcekur shkruan se PSG do të paguajë 10 milionë euro për këtë transferim.
Gjithçka do të bëhet zyrtare pas largimit të Pochettino-s, me parisienët të cilët janë në bisedime me avokatët e trajnerit argjentinas për të arritur një marrëveshje për kompensimin e shkarkimit të tij.
Galtier pritet të bëhet kështu trajneri i tretë francez i epokës së Al-Khelaifi-t në Paris, pas Antoine Kombouare dhe Laurent Blanc.
Christophe dy sezone më parë ia doli të triumfonte në Ligue 1 me Lille duke lënë pas pikërisht PSG-në dhe konsiderohet si një nga njohësit më të mirë të futbollit francez, ndërsa më parë ka drejtuar edhe St. Etienne, me të cilët fitoi Kupën e Ligës në sezonin 2012/13.
/Albanianpost.com