Përmes ndryshimeve kushtetuese kryeministri i Kosovës, Hashim Thaçi po synon t’ua vazhdojë minoriteteve vendet e rezervuara. Hapjen e Kushtetutës dhe ndryshimet e saj në fund të kësaj legjislature opozita e sheh si një process irracional dhe të dëmshëm.
Insistimin e kryeministrit Thaçi se “nuk ka reformë të mirëfilltë zgjedhore pa u hapur Kushtetuta” opozita e ka cilësuar si të dëmshëm dhe të padrejtë që si në qëllim ka vazhdimin e vendeve të rezervuara për minoritetet në Kuvendin e Kosovës. Kategorikisht kundër hapjes së Kushtetutës deri tani janë deklaruar dy partitë opozitare: LDK-ja dhe Vetëvendosja. Ndërkaq AAK-ja dhe Koalicioni për Kosovë të Re, megjithëse në parim janë kundër vendeve të rezervuara, ende nuk kanë qëndrim në lidhje me këtë çështje. PDK-ja e ka arsyetuar deklaratën e Thaçit me “faktin se vendet e rezervuara janë kërkesë edhe ndërkombëtare”.
Me përjashtim të PDK-së asnjë prej partive tjera shqiptare në Kuvendin e Kosovës nuk janë për ndryshimin e Kushtetutës, me qëllim që serbëve t’u vazhdohen mandatet e rezervuara.
Kryeministri Thaçi në një postim të tij në Facebook ka shkruar se ‘pa ndryshime kushtetuese nuk mund të ketë reformë të mirëfilltë zgjedhore’./Koha Ditore/