Peja sonte regjistroi fitoren e tetë radhazi në Superligë.
Në ndeshjen e vlefshme për javën e 28-të dhe të fundit për sezonin e rregullt, skuadra e drejtuar nga Rami Hadar mposhti Rahovecin, shkruan Gazeta Express.
Ndeshja e zhvilluar në palestrën sportive “Mizahir Isma” përfundoi me rezultatin 68:103.
Basketbollistët më të dalluar në fitoren e pejanëve ishin Larry Thomas me 16 pikë dhe Arti Hajdari e Alban Veseli, që shtuan nga 15 sosh.
Gary Blackston ishte më i dalluari te “Vreshtarët” me 18 pikë.
Peja e mbylli sezonin e rregullt me 21 fitore dhe shtatë humbje. Momentalisht është e para në tabelë me 49 pikë, vetëm një më shumë se Sigal Prishtina, që ka një ndeshje më pak.
Vlen të theksohet se “Verdhezinjtë” e kanë të siguruar kalimin direkt në gjysmëfinale të “Play-Offit”.
Në anën tjetër, Rahoveci e mbylli sezonin me vetëm katër fitore, krahas 24 humbjeve. Rahoveci, si i fundit në tabelë me 32 pikë, sezonin e ardhshëm do të jetë pjesë e Ligës së Parë. /Gazeta Express/