Drejtoria e Arsimit në Prizren ka marrë vendim që të ndalohen kërkesat për pushim pa pagesë në të gjitha shkollat e komunës së Prizrenit.
Drejtoresha e kësaj drejtorije, Luljeta Veselaj – Gutaj, tregon se për të kërkuar pushim pa pagesë, puntorët e arsimit duhet të kenë aryse të qëndrueshme në përputhje me legjislacionin në fuqi.
“Këtë vit kemi pasur vetëm një kërkesë të tillë”, tregon ajo.
Drejtori i shkollës fillore “Abdyl Frashëri” në Prizren, Alidin Flugaj, thotë se janë njoftuar për një vendim të tillë të DKA-së.
” Nuk ka pasur kërkesë të këtij lloji në shkollën tonë”, shprehet ai.
Edhe drejtoresha e shkollës “Hysen Rexhepi” në Prizren, Lumnije Rakaj, tregon se nuk janë paraqitur kërkesa për pushim pa pagesë në këtë shkollë.
Vendimi i Drejtorisë Komunale të Arsimit në Prizren ndalon mësimdhënësit dhe punëtorët e tjerë të arsimit që të kërkojnë pushime pa pagesë nëse nuk kanë arsye të qendrueshme, siç mund të jenë ato shëndetësore.
Para fillimit të vitit shkollor 2023/2024, Sindikata e Bashkuar e Arsimit, Shkencës dhe Kulturës në Kosovë kishte njoftuar se shifra e mësimdhënësve që kanë kërkuar pushim pa pagesë për një vit ishte afër 300.
Ndërkaq, ata janë shprehur më pas se me fillimin e gjysmëvjetorit të dytë në vitin 2024, numri i kërkesave të tilla është rritur deri në 500 apo 600. Arsye kryesore sipas tyre janë liberalizimi i vizave dhe kushtet e papërshtatshme për punë të puntorëve të arsimit në Kosovë. /TV Prizreni