Në ndeshjen e vlefshme për javën e shtatë të Superligës së Kosovës, Llapi shënoi një fitore bindëse 3:0 ndaj Suharekës në stadiumin “Zahir Pajaziti” në Podujevë, duke i shkaktuar ekipit të Suharekës humbjen e parë në këtë sezon, përcjell PrizrenPress.
Aksionet filluan shpejt, dhe momenti kyç i pjesës së parë ishte penalltia në minutën e 25-të, e cila u përsërit pas ndërhyrjes së VAR. Blend Baftiu dështoi në tentimin e parë, por u tregua i saktë në tentimin e dytë, duke i dhënë avantazhin Llapit në minutën e 27-të. Suhareka kërkoi një penallti në minutën e 38-të, por gjyqtari nuk e akordoi.
Në pjesën e dytë, Llapi shtoi presionin dhe në minutën e 50-të, Ahmed Januzi shënoi golin e dytë pas një asistimi nga Elvir Gashijani. Suhareka tentoi të rikthehej në lojë me disa kornera dhe aksione, por nuk arriti të rrezikojë seriozisht.
Në fund të ndeshjes, Arbnor Ramadani vulosi fitoren me një gol të bukur në minutën e 90+2′, pas një asistimi të Ergyn Ahmetit. Pavarësisht ndëshkimeve të shumta me kartonë të verdhë për të dyja ekipet, Llapi e kontrolloi lojën deri në fund./PrizrenPress.com/