Kryetari i Komunës së Dragashit, Bexhet Xheladini, së bashku me kryesuesen e Kuvendit, Arijeta Skeraj, nënkryetarin Resul Fetahu dhe anëtarë të tjerë të kabinetit, morën pjesë në panelin e diskutimit me temën “Ngritja e kapaciteteve të fermerëve të mjedrës,” organizuar nga Shoqata Regjionale e Mjedrës “HitBerry”.
Në fjalën e tij, kryetari Xheladini vlerësoi potencialin e lartë të zonave malore të Dragashit për kultivimin e mjedrës, duke theksuar rëndësinë e politikave afatgjata që mbështesin sektorin.
“Sipërfaqet malore të Komunës së Dragashit janë hapësira me potencial të jashtëzakonshëm të kultivimit të mjedrës dhe frutave të ngjashme që mund t’u ofrojnë fermerëve tanë një mundësi të mirë për zhvillimin e bizneseve të tyre”, deklaroi ai, përcjell PrizrenPress.
Paneli u moderua nga Eroll Bajrami dhe përfshiu diskutime nga ekspertë të ndryshëm si Kujtim Lepaja, drejtor ekzekutiv i Shoqatës Kombëtare “Mjedra e Kosovës” dhe Naim Krasniqi, menaxher i përgjithshëm i Fondacionit “Agrodev”. Diskutimet u përqendruan në sfidat dhe arritjet e vitit, si dhe në planet për vitin e ardhshëm.
Organizatorët vlerësuan përkushtimin e Kryetarit Xheladini për zhvillimin e bujqësisë, duke shprehur bindjen se Dragashi do të bëhet një nga qendrat kryesore të kultivimit të mjedrës në Kosovë./PrizrenPress.com/
Përjetoni pushime të paharruar dhe dasma magjike në Hotel “Albes Residence”
