Në një ceremoni zyrtare të mbajtur në Handwerkskammer Koblenz në Gjermani, janë çertifikuar me titullin e lartë profesional “Mjeshtër” gjithsej 678 profesionistë nga 26 shtete të ndryshme të botës.
Pjesë e këtij suksesi ndërkombëtar ishin edhe tre zejtarë nga Kosova, të cilët jetojnë dhe veprojnë në Gjermani. Ata janë: Zoj Kafexholli, nga Bellanica, Komuna e Malishevës; Amir Mustafa, nga Komuna e Vushtrrisë dhe Azemine Raka, nga Komuna e Deçanit, përcjell PrizrenPress.
Ky çertifikim vjen si pjesë e një tradite të gjatë gjermane në avancimin e zejtarisë. Sipas njoftimit të Odës së Prizrenit, çertifikimi i parë me titullin “Mjeshtër” në Gjermani është bërë që në vitin 1902, duke përfaqësuar një standard të lartë profesional dhe etik në fushën e zanateve.
“Gjermania ka arritur zhvillimin ekonomik falë zejtarisë. Sot në Gjermani, rinia është shumë e interesuar për zanate. Arritja e stafit profesional të zejtarëve u mundësua falë programeve dhe përkrahjes së cilësisë së zanatit. U rregullua një veprimtari – një zanat, dhe kjo rriti cilësinë e punës”, thuhet në njoftimin e Odës.
Oda e Prizrenit përgëzon të çertifikuarit nga Kosova për këtë arritje të rëndësishme dhe shpreh krenarinë për kontributin e tyre në promovimin e vlerave profesionale të vendit tonë në diasporë./PrizrenPress.com
