Ndërtimet kryesore në Prizren në pjesën e dytë të shekullit XVI lidhen ngushtë me emrin e Gazi Mehmed Pashës. Ndërtoi hamam, xhami, tyrbe, medrese, bibliotekë, dershane dhe objekte të tjera përcjellëse.
Krejt këto prej vitit 1563 deri më 1574. Shumica e monumenteve janë ende në këmbë, por bashkë me to gjëllijnë edhe legjendat për ndërtimin e tyre.
Hamami, xhamia dhe biblioteka, përpos që vazhdojnë të përfaqësojnë vlera të çmuara të trashëgimisë osmane në këto anë, me vete bartin edhe një histori të gojëdhënave të ndryshme popullore mbi financimin, ndërtimin dhe ceremonitë e hapjes së tyre. Njëra prej tyre është ajo për “larjen” e parave në Lumëbardhë, shkruan Koha Ditore
Njashtu sikur kjo edhe të tjera janë bartur brez pas brezi dhe ende vazhdojnë të tregohen nga të vjetrit e qytetit, ndonëse vetëm në rrethe të ngushta të shoqërisë.
Sipas një tregimi të tillë popullor, që është publikuar në revistën turke “Akademi”, Gazi Mehmed Pasha pasi merr vendim që të ndërtojë xhaminë, donte të vërtetohej se monedhat që do t’i shpenzojë për këtë qëllim janë hallall. Për këtë arsye ai i merr monedhat e arta dhe i hedh në Lumëbardhë.