Komedia “Kur njihesh në internet”, ka rikthyer regjisorin shqiptar Kiço London në Teatrin Kombëtar të Tiranës. Mediat shqiptare kanë shkruar se premiera e së shtunës mbrëma është pritur mirë nga publiku.
“Me regji të Kiço Londos, komedia mbërriti pas shumë udhëtimesh në skenën e madhe të kryeqytetit, një rikthim ky plot emocion për London, në skenën e TK-së, pas një mungese 7 vjeçare”, ka shkruar BW.
“Kur njihesh në internet” është një vazhdim i komedisë “Një burrë me dy gra”, e vënë në skenë në vitin 1998 nga regjisori i njohur. Në këtë pjesë të dytë, Londo ua ka besuar interpretimin, aktorëve të rinj si, Roland Saro, Orsi Vangjeli, Ermira Hysaj, Esela Pysqyli, Alesia Xhemalaj, Ergys Çekrezi dhe aktorit që po ashtu i rikthehet komedisë, Xhevahir Zeneli.
Shfaqja është bazuar në dramën e autorit anglez Ray Cooney.
“Ray Cooney, i njohur si ‘mjeshtër i farsës’, sjell një tjetër farsë, këtë herë duke qenë kontemporan dhe duke u përshtatur me fenomenet sociale të kohës. Interneti është një nga këto risi dhe Cooney ka gjetur korsinë e tij të udhëtimit në autostradën e madhe të komedisë për ta sjellë për publikun këtë fenomen me të mirat dhe të këqijat e tij”, është shprehur Londo për mediat.