Kosova është në prag të fillimit të fushatës zyrtare për zgjedhjet parlamentare të 8 Qershorit, por puna më e madhe është në Komisionin Qendror të zgjedhjeve që do të merret me përgatitjen e të gjithë procesit.
Kryetarja e Komisionit Qendror të Zgjedhjeve në Kosovë, Valdete Daka, ishte e ftuar në “Revistën Televizive të Mbrëmjes” në TCH. Daka tha se të gjitha subjektet politike tashmë kanë dorëzuar listat e kandidatëve dhe përgatitjet për zgjedhjet parlamentare po ecin normalisht.
Sipas kryetares së KQZ-së, në listat zgjedhore janë të regjistruar 1 milion e 787 mijë votues.
“Afatet e shkurtra janë një sfidë dhe të gjithë kanë qenë nën presion. Na është dashur të punojmë 24 orë. Këtë radhë nuk besojë se veriu do të jetë një sfidë më e madhe se herën e kaluar, pasi tani nuk e kemi më atë barrën politike. Subjektet politike nga veriu janë të interesuara të garojnë për Parlamentin e Kosovës dhe e gjithë kjo ka sjell që situata politike të jetë më pak e tensionuar”, ka thënë Daka, transmeton TCH.
KQZ ka kërkuar asistencë nga OSBE-ja, meqenëse situata e sigurisë është ende e brishtë.
“Asistenca e OSBE-së do të jetë e fokusuar vetëm në katërfusha të veprimtarisë tonë dhe nuk do të jetë aq e gjerë sa ka qenë edhe në zgjedhjet lokale”, shton Daka.
Kur është fjala për votimin e emigrantëve, ajo tha se votimi jashtë Kosovës është paksa i komplikuar.
“Së pari këta persona duhet të aplikojnë që të regjistrohen si votues jashtë Kosovës dhe nëse i plotësojnë kushtet, Komisioni dërgon fletën e votimit dhe më pas ata këtë fletvotim, me anë të postës, e kthejnë në KQZ”, thekson Daka.