Grupi i ribashkuar së fundmi me një përbërje të plotësuar, “Cute Babulja”, njëkohësisht njëri ndër bendet më të vlerësura të rock/alternative në Kosovë, ka publikuar zyrtarisht videoklipin e këngës “Lule” në faqen e tyre në “YouTube”.
Me regji të Kaltrina Krasniqit, e cila njihet për bashkëpunimin me Genc Salihun në videoklipet e tij të dalluara, “Lule” ka kohëzgjatje prej rreth 8 minutash dhe e ka të pranishëm një element tashmë të njohur social, “selfie-n” .
Ndërkaq, kjo këngë me videoklip si duket është e para në atë çfarë pritet të jetë albumi i parë i “Cutes” së re, ku tashmë bëjnë pjesë përpos dy anëtarëve origjinal, Enes Bajramliqit dhe Genc Salihut, edhe Arbër Salihu, Tomor Kuçi dhe Fatjon Miftaraj.
“Cute Babulja” erdhi me plot sukses në vitin 2004 në skenën shqiptare, ku solli një album të freskët dhe alternativ. Këngët “Udhë të mbarë” dhe “Kolateralisht” u shoqëruan me videoklipe interesante, madje kjo e fundit ishte fituese e çmimit kryesor në “VideoFest 2004?.