Dhjetëra qytetarë të Shkupit kanë protestuar sot kundër dënimit me burgim të përjetshëm të gjashtë të akuzuarve në rastin “Monstra”. Ndryshe nga protestat dramatike, që u zhvilluan të premten dhe të shtunën në Shkup, protesta e sotme u zhvillua e qetë dhe pa asnjë incident.
Në protestën e sotme forca të shumta policie si dhe automjete të blinduara kanë ndjekur protestuesit nga Çairçanka deri në afërsi të qendrës së lagjes Mavrovasja, prej ku më pas protestuesit u shpërndanë në mënyrë të qetë.
Prostesta u zhvilluan ditën e sotme edhe në Tetovë dhe Dibër, pasi ishte lajmëruar më herët në rrjetet sociale. Ndërkaq, po në rrjetet sociale janë paralajmëruar protesta edhe në Tiranë, për ditën e martë.
“Së bashku me çdo qytetar mblidhemi të Martën në oren 18:00 tek Piramida (Tiranë) në mbështetje të vëllezervë tanë Shqiptarë në Maqedoni… Me pjesëmarrjen dhe të Kampionit të Europës, Nuri Seferi…”, njoftohet në rrjetet sociale.
Ambasada Amerikane, Zyra e Bashkimit Evropian, misionet e NATO-s dhe të OSBE-së në Shkup, përmes një komunikate të përbashkët theksojnë të drejtën për të protestuar në mënyrë të qetë dhe dënojnë sjelljet e dhunshme. Edhe diplomatët perëndimorë bëjnë thirrje për dialog midis qytetarëve dhe politikanëve, për qetësimin e marrëdhënieve ndëretnike në vend.
Familjarët e të dënuarve thanë se protestat e qeta do të vazhdojnë deri në lirimin e të familjarëve të tyre, për të cilët thanë se janë dënuar pafajësisht.
Më herët, gjatë protestës, dhjetëra të rinj kanë marshuar nga qendra e Tetovës në drejtim të Gjykatës, duke vazhduar rrugës kryesore, drejt selisë së BDI-së. Protestuesit kërkojnë drejtësi dhe brohorisnin kundër BDI-së, “Poshtë qeveria”. Gjendja ka qenë e acaruar, për shkak të protestave të paralajmëruara për ditën e dytë. Ato u përkeqësuan që ditën e parë, pasi pati shumë arrestime e të lënduar të cilët për momentin gjenden nën kujdesin mjekësor.